Բաժանորդագրվեք Zarkerak.am-ի տելեգրամ ալիքին։
Ռուսաստանն ուժեղացրել է գաղտնի ջանքերը՝ տապալելու հաջորդ ամիս կայանալիք ընտրություններում վերընտրվելու Հայաստանի առաջնորդի փորձերը՝ մտավախություն ունենալով, որ նրա հաղթանակը կարող է վերջնականապես ամրագրել նախկին խորհրդային հանրապետության վերակողմնորոշումը դեպի Արևմուտք: Այս մասին հայտնում է Reuters-ը՝ հղում անելով արևմտյան հետախուզության և կառավարության պաշտոնյաներին:
Լինելով 3 միլիոն բնակչություն ունեցող և դեպի ծով ելք չունեցող երկիր՝ Հայաստանը Սառը պատերազմից ի վեր հիմնականում մնացել է Մոսկվայի ուղեծրում և հյուրընկալում է ռուսական զորքեր։ Սակայն վարչապետ Նիկոլ Փաշինյանը, ով գլխավորում է հարցումների արդյունքները, մերձեցել է Եվրոպայի և ՆԱՏՕ-ի հետ՝ հանդես գալով որպես ԱՄՆ նախագահ Դոնալդ Թրամփի դաշնակից, ով աջակցություն է հայտնել Փաշինյանի վերընտրվելու հայտին։
ՌԴ նախագահ Վլադիմիր Պուտինը չի թաքցրել իր դժգոհությունը Փաշինյանի շրջադարձից։ Վերջին օրերին Մոսկվան նախազգուշացրել է, որ Հայաստանը ռիսկի է դիմում զրկվել էժան բնական գազի մատակարարումներից, և սահմանափակել է հայկական արտադրանքի, այդ թվում՝ մրգերի, բանջարեղենի, ծաղիկների և կոնյակի ներկրումը։
«Այն, ինչ փորձում է անել Փաշինյանը, սպառնալիք է Ռուսաստանի համար»,- ասել է «Կարնեգի Եվրոպա» կենտրոնի ավագ գիտաշխատող Թոմաս դե Վաալը։ Դիվերսիֆիկացումը նշանակում է, որ «Ռուսաստանը կորցնում է այն վիրտուալ մենաշնորհը, որն ունեցել է Հայաստանում»։
Արևմտյան պաշտոնյաներից երեքի խոսքով՝ Մոսկվայի նախընտրելի թեկնածուն միլիարդատեր Սամվել Կարապետյանն է, ով գտնվում է դատավարության մեջ՝ իշխանությունը տապալելու կոչեր հնչեցնելու մեղադրանքով։ Ազգությամբ հայ ռուսաստանաբնակ Կարապետյանը հերքում է մեղադրանքները։ Նրա փաստաբան Ռոբերտ Ամստերդամը Reuters-ին հայտնել է, որ իր պաշտպանյալը տեղյակ չէ ռուսական որևէ աջակցության մասին։
Հոկտեմբերին Կրեմլը հիմնել է մի ստորաբաժանում, որը հայտնի է որպես Ռազմավարական համագործակցության և գործընկերության վարչություն, որն էլ, ըստ աղբյուրներից չորսի, համակարգում է Հայաստանում ազդեցության գործողությունները։ Աղբյուրները, ինչպես և սույն հոդվածի մյուս տեղեկատուները, խոսել են անանունության պայմանով։ Ռուս պաշտոնյաները վերջին ամիսներին քննարկել են Ռուսաստանում բնակվող հայերին Հայաստան ուղարկելու հարցը՝ Փաշինյանի ընդդիմադիրների օգտին քվեարկելու համար, հայտնել են աղբյուրներից հինգը։
Հայերն ունեն մեծ համաշխարհային սփյուռք, այդ թվում՝ Ռուսաստանում, որտեղ բնակվողների թիվը, ըստ որոշ գնահատականների, անցնում է 2 միլիոնից։ Հայերին թույլատրված չէ արտերկրից մասնակցել ընտրություններին։ Ռուսական իշխանությունները հաշվարկել են մոտ 50 միլիոն դոլարի ծախս՝ 100,000 ընտրող տեղափոխելու համար, հայտնել են աղբյուրներից երեքը։ Այդ պաշտոնյաները հավելել են, որ մայիսի կեսերին Կրեմլն արդեն քվոտաներ է սահմանել, թե յուրաքանչյուր տարածաշրջան քանի հայ պետք է ուղարկի, և պահանջել է ադմինիստրատորներին զեկուցել նախապատրաստական աշխատանքների ընթացքի մասին։
Reuters-ին չի հաջողվել պարզել՝ արդյոք նման ծրագիրն արդեն ընթացքի մեջ է, թե՞ դա բավարար կլինի առաջատարների միջև առկա մեծ տարածությունը կրճատելու համար։ Այս ամսվա սկզբին անցկացված հարցումը ցույց է տվել, որ Փաշինյանի «Քաղաքացիական պայմանագիր» կուսակցությունը կզբաղեցնի առաջին տեղը՝ հավաքելով ձայների շուրջ 30%-ը։ Բազմամարդ ընտրապայքարում հարցումները Կարապետյանի «Ուժեղ Հայաստան» կուսակցությանը հատկացրել են մոտ 6%՝ թողնելով նրանց հեռավոր երկրորդ հորիզոնականում։
