Բաժանորդագրվեք Zarkerak.am-ի տելեգրամ ալիքին։
Ռուսաստանը չի աջակցի Երևանին ո՛չ Եվրասիական տնտեսական միության (ԵԱՏՄ) շրջանակներում, ո՛չ էլ երկկողմ համաձայնագրերի շրջանակներում, եթե երկիրը որոշի շարունակել իր մերձեցումը Եվրամիության հետ։ Հետագա որոշումները, ի թիվս այլ բաների, կախված կլինեն Հայաստանում կայանալիք ընտրությունների արդյունքից, «Ինտերֆաքս»-ին ասել է Ռուսաստանի փոխվարչապետ Ալեքսեյ Օվերչուկը։
«Մենք չենք կարող ֆինանսական աջակցություն ցուցաբերել այն երկրին, որն իր ապագան տեսնում է Ռուսաստանի դեմ պատերազմի պատրաստվող Եվրամիությունում։ Ինչո՞ւ պետք է աջակցություն ցուցաբերենք նման երկրին։ Մենք փող ենք տալու նրանց, ովքեր կարող է՝ վաղը մեր դեմ կռվե՞ն»,- ընդգծել է Օվերչուկը։
ՌԴ փոխվարչապետը հիշեցրել է, որ Ռուսաստանը դեռևս պահպանում է իր պարտավորությունները Հայաստանի նկատմամբ ԵԱՏՄ շրջանակներում, սակայն դրանք կարող են վերանայվել, եթե երկիրը որոշի շարժվել դեպի Եվրամիություն։
«Մենք չենք ուզում, որ Հայաստանը դուրս գա Եվրասիական տնտեսական միությունից։ Բայց ասում ենք. եթե դուք ձեր ժողովրդին տանում եք դեպի Եվրամիություն, որն այժմ թշնամաբար է տրամադրված Ռուսաստանի, Բելառուսի նկատմամբ և պլանավորում է կռվել մեր դեմ, ապա ինչո՞ւ պետք է մենք աջակցենք ձեզ՝ առանց մաքսատուրքերի, բաց շուկաների, էներգակիրների ցածր գների, աշխատուժի ազատ տեղաշարժի, առանց արտոնագրային վճարների և առողջության ապահովագրության պայմաններում»,- պարզաբանել է փոխվարչապետը Ռուսաստանի դիրքորոշումը։
